Դաշնակահար, ՀՀ վաստակավոր արտիստ Հայկ Մելիքյանը հոկտեմբերի 5-ին մենահամերգով հանդես կգա Բրյուսելի Պողոսյան հիմնադրամի դահլիճում: Ինչպես նշված է հիմնադրամի կայքում՝ համերգից ստացված ողջ հասույթը ուղղվելու է SOAR (Հայ որբերի օգնության միություն) բարեգործական հիմնադրամին: Հայկ Մելիքյանը բարձրակարգ դաշնակահար է, ով ունի նաև անզուգական մեկնաբանական հմտություններ: Նա ճանաչված և սպասված է միջազգային բեմերում, ելույթ է ունենում երաժշտական փառատոներում, տալիս է վարպետության դասեր: Մելիքյանը կատարում է արևմտյան և արևելյան երկրների հեղինակների ինչպես դասական, այնպես էլ ժամանակակից ստեղծագործություններ: Համերգին կհնչեն Ֆրեդերիկ Շոպենի պոլոնեզները և վալսերը, Կլոդ Դեբյուսիի պրելյուդները, իսկ հայ կոմպոզիտորներից դաշնակահարը կկատարի Կոմիտասի, Վաչե Շարաֆյանի, Հարություն Դելլալյանի և Առնո Բաբաջանյանի ստեղծագործությունները։