Երաժշտարվեստի ոլորտի գործիչներն արժանացել են պետական բարձր պարգևների - Armenian National Music (anmmedia.am)
Երաժշտարվեստի ոլորտի գործիչներն արժանացել են պետական բարձր պարգևների

Հրապարակվել է՝ Հլս 03 2020, 21:31

Հեղինակ՝ ANM Media
Հանրապետության նախագահ Արմեն Սարգսյանի հրամանագրերով երաժշտության, արվեստի, սպորտի բնագավառների մի խումբ ներկայացուցիչներ արժանացել են պետական բարձր պարգևների՝ իրենց ոլորտների զարգացման գործում ներդրած նշանակալի ավանդի համար:

Երաժշտարվեստի բնագավառում ունեցած նշանակալի ավանդի համար թավջութակահար Արամ Թալալյանն արժանացել է Երախտագիտության մեդալի, Կոմիտասի անվան ազգային քառյակի 1-ին ջութակահար, գեղարվեստական ղեկավար Էդուարդ Թադևոսյանը և քառյակի ալտահար Ալեքսանդր Կոսեմյանը քառյակի հիմնադրման 95-ամյակի կապակցությամբ արժանացել են Հայրենիքին մատուցած ծառայությունների համար առաջին կարգի շքանշանի, 2-րդ ջութակահար Սյուզի Երիցյանը՝ «Մովսես Խորենացի» մեդալի իսկ քառյակի տնօրեն Սամվել Մեսրոպյանը պարգևատրվել է Երախտագիտության մեդալով։ 

Շնորհավորելով պարգևատրվածներին՝ նախագահ Սարգսյանը նշել է, որ նրանք իրենց գործունեությամբ, արվեստով, կատարած աշխատանքով արդեն իսկ վաստակել են ժողովրդի հարգանքն ու գնահատանքը: «Ուրախ եմ, որ երկար տարիների ձեր հայրենանվեր ներդրումը գնահատվում է ոչ միայն շքանշանով, այլև մեր ժողովրդի կողմից,-նշել է նախագահը:- Քաջալերում եմ այն գործունեությունը, որ իրականացրել եք վերջին տարիներին և վստահ եմ, որ շարունակելու եք նույն եռանդով և նվիրումով»:

Պարգևների արժանացած գործիչներն իրենց հերթին շնորհակալություն են հայտնել նույնիսկ ներկայիս դժվարին իրավիճակում իրենց վաստակը գնահատելու և արժևորելու համար:

Լուսանկարը՝ President.am-ի