Մարտի 19-ին, ժամը 19:00-ին Արամ Խաչատրյանի տուն-թանգարանի համերգասրահում տեղի կունենա «Դաշնամուրի ու ջութակի տասը սոնատները և ժամանակի երաժշտական աշխարհը» համերգաշարի երկրորդ համերգը: Համերգաշարը նվիրված է գերմանացի հանճարեղ կոմպոզիտոր Լյուդվիգ վան Բեթհովենի ծննդյան 250-ամյա հոբելյանին: Երեկոյի ընթացքում Խաչատրյանի անվան տրիոյի երաժիշտներ Արմինե Գրիգորյանի (դաշնամուր) և Կարեն Շահգալդյանի (ջութակ) կատարմամբ կհնչի Բեթհովենի 1798թ. գրված Թիվ 2 սոնատը դաշնամուրի և ջութակի համար: Համերգին կմասնակցեն նաև Սոնա Արզումանյանը (ջութակ), Արմեն Թորոսյանը (ալտ),Վահան Գրիգորյանը (թավջութակ): Երեկոյի ընթացքում կկատարվեն նաև Ջովաննի Բատիստա Վիոտտիի, Յոզեֆ Հայդնի և Ջուզեպպե Տարտինի - Ֆրից Կրեյսլերի ստեղծագործություններից: Համերգաշարը մեկնարկել է 2019 թ. դեկտեմբերի 26-ին: Յուրաքանչյուր համերգի ընթացքում կկատարվեն կոմպոզիտորի սոնատներից, ինչպես նաև իր ժամանակի երաժշտական գլուխգործոցներից: