Կոմպոզիտոր Արամ Խաչատրյանի մանկական ստեղծագործություններն ընդգրկվել են երիտասարդ ֆրանսիացի դաշնակահար Տրիստան Պֆաֆի նոր՝ «Մանկության նկարներ» ("Tableaux d’enfance") ձայնասկավառակում։ Ինչպես ANM-ին հայտնեց դաշնակահարը, իր նոր ալբոմում ընդգրկված են Արամ Խաչատրյանի Մանկական առաջին ալբոմից «Անդանտինոն» և երկրորդ ալբոմից՝ 10 պիեսներ։ Սկավառակում տեղ են գտել նաև ռուս կոմպոզիտոր Դմիտրի Կաբալևսկու մանկական ստեղծագործությունները։ Ձայնասկավառակը վաճառքի կհանվի մարտի 6-ին, իսկ շնորհանդեսը կկայանա մարտի 26-ին՝ Փարիզի "Salle Colonne"-ում։ Տրիստան Պֆաֆը Փարիզի Կոնսերվատորիայի շրջանավարտ է, միջազգային բազմաթիվ մրցույթների դափնեկիր։ Հայաստանում նա ելույթ է ունեցել երեք անգամ։