Բելգիացի երաժիշտները խաղաղության կոչ են հնչեցրել՝ ի աջակցություն Արցախի - Armenian National Music (anmmedia.am)
Բելգիացի երաժիշտները խաղաղության կոչ են հնչեցրել՝ ի աջակցություն Արցախի

Հրապարակվել է՝ Հկտ 05 2020, 19:16

Հեղինակ՝ ANM Media
Բելգիայի Անտվերպեն քաղաքում երեկ կայացել է դասական համերգ՝ դաշնակահար Լիբրեխտ Վանբեկեվորտի, կլառնետահար Ռոլանդ Հենդրիկսի և թավջութակահար Սևակ Ավանեսյանի մասնակցությամբ։ 

Ինչպես
ANM-ի հետ զրույցում նշեց հայ թավջութակահարը, համերգը վաղուց է պլանավորված եղել և ծրագրում ընդգրկված էին Բեթհովենի տրիոները,  և քանի որ Արցախում տեղի են ունենում ծանրագույն մարտեր, երաժիշտները որոշել են իրենց ունկնդրի ուշադրությունը սևեռել այս իրադարձությանը։ 

«Կատարել ենք Արվո Պյարտի «Մոցարտ-Ադաջոն»։ Արցախյան իրադարձությունների մասին պատմեցի գործընկերներիս, և մենք՝ արվեստագետներս միասին որոշեցինք մեր խոսքը հղել երաժշտասերներին, քանի որ անմեղ մարդիկ են զոհվում։ Համերգից հետո շատերը մեզ մոտեցան, նշեցին, որ եղել են Հայաստանում և իրենց աջակցությունն են հայտնում մեր հայրենիքին»։ 


Հիշեցնենք, որ Սևակ Ավանեսյանը այս տարվա հուլիսյան մարտերի ամենաթեժ պահին Տավուշի Մովսես գյուղում էր և ելույթ է ունեցել գյուղի բնակիչների ու զինվորականների համար։