Չելյաբինսկի մարզային սիմֆոնիկ նվագախումբը համերգներով հանդես կգա Երևանում

Չելյաբինսկի մարզային սիմֆոնիկ նվագախումբը սեպտեմբերի 3-ին և 4-ին համերգներով հանդես կգա Երևանում։ Սեպտեմբերի 3-ին Ռուսաստանի դեսպանատանը տեղի կունենա կամերային համերգ, հայտնում է Classical Music News-ը։

Երևանյան համերգները կանցկացվեն Հայաստանի և Չելյաբինսկի մարզի միջև մշակութային համագործակցության շրջանակում։ Այցի ընթացքում նախատեսված է երկու համերգային ծրագիր։

Նվագախմբի գլխավոր համերգը նախատեսված է սեպտեմբերի 4-ին՝ Արամ Խաչատրյանի անվան համերգասրահում։ Երեկոյի ընթացքում կհնչեն Սերգեյ Պրոկոֆևի Հինգերորդ սիմֆոնիան և Պյոտր Չայկովսկու Առաջին դաշնամուրային կոնցերտը։ Չայկովսկու ստեղծագործության մենակատարը դաշնակահար Ալեքսանդր Կլյուչկոն է՝ միջազգային մրցույթների դափնեկիր և Սերգեյ Ռախմանինովի անվան մրցույթի հաղթող։

Չելյաբինսկի մարզային սիմֆոնիկ նվագախմբի գեղարվեստական ղեկավար և գլխավոր դիրիժոր Ալեքսեյ Ռուբինի խոսքով՝ Երևանյան այցը միայն համերգային հյուրախաղ չէ, այլ մշակութային փոխանակման կարևոր նախաձեռնություն։

«Այս ուղևորությունը ավելին է, քան պարզապես հյուրախաղերը․ սա մեր երկրների միջև մշակութային փոխանակման շրջանակում անցկացվող համերգներ են», – նշել է Ռուբինը։

Նվագախումբը Երևան է ժամանում Հայաստանի կրթության, գիտության, մշակույթի և սպորտի նախարարության հրավերով։ Այցի շրջանակում նախատեսվում է նաև Հայաստանի և Չելյաբինսկի մարզի մշակույթի նախարարների հանդիպում։

«Այս կամուրջը հիմա շատ կարևոր է։ Այն ցույց է տալիս, որ մշակույթը վեր է ամեն ինչից, այն միավորում է բոլորին», – ընդգծել է Ալեքսեյ Ռուբինը։

Չելյաբինսկի մարզային սիմֆոնիկ նվագախումբը հիմնադրվել է յոթ տարի առաջ և վերջին տարիներին ակտիվ համերգային գործունեություն է ծավալում։ Երևանյան հյուրախաղերը կդառնան կոլեկտիվի միջազգային համագործակցության հերթական կարևոր փուլը։