Նոր շունչ ու նոր քամի են բերում բոլորին. Վահագն Հայրապետյանը նոր նախագծի մասին - Armenian National Music (anmmedia.am)
Նոր շունչ ու նոր քամի են բերում բոլորին. Վահագն Հայրապետյանը նոր նախագծի մասին

Հրապարակվել է՝ Հնս 22 2020, 19:50

Հեղինակ՝ ANM Media
Ջազմեն, ՀՀ վաստակավոր արտիստ Վահագն Հայրապետյանն ու ընկերները ներկայացնում են "IMP LIVE" (International Musicians Platform Live) նոր նախագիծը: "IMP LIVE"-ն առցանց երաժշտական հարթակ է, որը միավորելու է ամբողջ աշխարհի երաժիշտներին մեկ հարկի տակ: Նախագծի շրջանակներում տեղի են ունենալու կենդանի համերգներ, հարցազրույցներ, հանդիպումներ և վարպետության դասեր:

Այս ամենի մեկնարկը կտրվի հունիսի 23-ին՝ Վահագն Հայրապետյանի և իր եռյակի համերգով, որի շրջանակներում երաժիշտն ավելի մանրամասն կներկայացնի նախագիծը: Այստեղ տեղի են ունենալու կենդանի համերգներ ինչպես հայտնի, այնպես էլ նոր անունների մասնակցությամբ: Ի տարբերություն շատ ինտերնետային հարթակների, այս հարթակը տարբերվելու է իր ինտերակտիվությամբ։ Բացի նրանից, որ ունկնդիրը տեսնելու է արտիստներին, երաժիշտներն էլ կտեսնեն իրենց ունկնդրին և անմիջական կապի մեջ կմտնեն իրար հետ։ Ինչպես Վահագն Հայրապետյանն է ասում՝ նոր շունչ ու նոր քամի են բերում բոլորին:          

Նախագծի գաղափարը ծնվեց համավարակի օրերին, երբ ողջ աշխարհում դադարեցվեցին կենդանի համերգները ոչ միայն համերգասրահներում, այլև ակումբներում: Բազմաթիվ արտիստներ տեղափոխվեցին առցանց հարթակ, իսկ Վահագն Հայրապետյանը սկսեց ամեն օր իր ուղիղ եթերներով ուրախացնել երկրպագուներին: 

«Մարտի 26-ից ամեն օր 2,5 ամիս դուրս էի գալիս ուղիղ եթեր իմ բնակարանից՝ ընտանիքիս հետ միասին: Ընթացքում հասցրեցինք համատեղ ելույթներ ունենալ ռուս և ամերիկացի գործընկերներիս հետ: Վերջին առցանց համերգը տեղի ունեսավ հունիսի 1-ին՝ Երեխաների պաշտպանության միջազգային օրը: Այս օրը դաշնակահար Օլեգ Ստարիկովը Մոսկվայից իր շուրջը համախմբեց ԱՊՀ երկրներում ապրող իր գործընկերներին և իրենց երեխաներին: Այս ընթացքում էլ Կարեն Բաղինյանի և Բագրատ Մեհրաբյանի հետ ծնվեց այս գաղափարը: Ընթացքում սկսեցինք հավաքել մեր թիմը, որոնց թվում են  Ռաֆայել Պետրոսյանը, «Ալֆա սաունդ» ձայնագրման ստուդիան, «Սթրիմ սեթ» ընկերությունը և այլոք»,- ANM-ի հետ զրույցում ասաց Վահագն Հայրապետյանը: 

Ջազմենի խոսքով՝ նախագիծը ժանրային սահմանափակում չի դնելու. ամենակարևոր չափանիշը որակն է թե՛ կատարողական, թե՛ տեխնիկական: Այդ իսկ պատճառով համերգները տեղի են ունենալու ստուդիայում և իրենց առջև դրվելու է մեծ էկրան: Ունկնդիրները հնարավորություն կունենան ուղղելու իրենց հարցերը կատարողներին:Յուրաքանչյուր ոք կարող է իր ներդրումն ունենալ՝ հարթակի զարգացման համար, հանգանակելով ցանկացած գումար:

Համերգը սկսվելու է ժամը 21:00-ին, սակայն մուտքը դեպի համակարգ սկսելու է ժամը 20:00-ից, քանի որ յուրաքանչյուրի մասնակցությունը պետք է տեխնիկական պրոցես անցնի:

Հեղինակ՝ Սոնա Խաչատրյան

Լուսանկարը՝ Հրանտ Խաչատրյանի