Աշոտ Զոհրաբյան

Կոմպոզիտոր

Կոմպոզիտոր

Կենսագրություն

Աշոտ Զոհրաբյանը ծնվել է 1945 թվականի հունվարի 29-ին Երևանում: Հիմնական կրթությունը ստացել է Կոմիտասի անվան Երևանի պետական կոնսերվատորիայում 1967-1972թթ.` սովորելով Գրիգորի Եղիազարյանի ստեղծագործական դասարանում: 1972-2008 թթ. Առնո Բաբաջանյանի անվան երաժշտական մանկավարժական ուսումնարանում դասավանդել է տեսական առարկաներ: Այնուհետև դասավանդել է կոնսերվատորիայում` նախ որպես գործիքների և երաժշտության տեսության դասախոս, ապա կոմպոզիցիայի պրոֆեսոր: Նրա երաժշտությունը կատարվել է աշխարհի տարբեր երկրներում` Ռուսաստանում, Ուկրաինայում, Բելոռուսում, Ֆրանսիայում, Գերմանիայում, Շվեցարիայում, Թուրքիայում, ԱՄՆ-ում:

Հեղինակ է կամերային, գործիքային, վոկալ-գործիքային ստեղծագործությունների:

Ստացել է ԵՊԿ պրոֆեսորի գիտական աստիճան: 2012 թ. արժանացել է ՀՀ արվեստի վաստակավոր գործչի կոչման: Կամերային ստեղծագործությունների համար արժանացել է Արամ Խաչատրյանի անվան մրցանակի: Համաշխարհային Հայկական կոնգրեսի մրցանակաբաշխության դափնեկիր է: 2017 թ․ պարգևատրվել է ՀՀ մշակույթի նախարարության Ոսկե մեդալով։