Նաիրյան վոկալ անսամբլ - Armenian National Music (anmmedia.am)
Նաիրյան վոկալ անսամբլ

Խմբեր

Նաիրյան վոկալ անսամբլը ստեղծվել  է 2015 թ․ -ին «Մուղդուսյան» արվեստի կենտրոնի մշակութային ծրագրերի շրջանակներում: Անսաբլի գեղարվեստական ղեկավարը  Նաիրա Մուղդուսյանն է։

Նման անսամբլ  ձևավորելու հիմքում եղել է հայ դասական կոմպոզիտորների ստեղծագործությունների հանրահռչակման միտումը, ազգային  դասական և հոգևոր երաժշտության տարածումը, ինչպես նաև կանանց հզորացումը։  

Անսամբլի կազմում 5 երիտասարդ, պրոֆեսիոնալ երաժշտական կրթությամբ կին երաժիշտներ են։ Խումբը երգում է բազմաձայն երգեր, հիմնականում ակապելլայի ձևչափով, կան կատարումներ, որոնք նվագակցվում են կլարնետով, դափով, երաժշտական այլ գործիքներով, որոնց տիրապետում են աղջիկները։  Անսամբլն ունեցել  է բազմաթիվ    տասնյակ մենահամերգներ, հարյուրից ավելի ելույթներ տարբեր միջոցառումներին, այդ թվում՝ Երևանի գրեթե բոլոր թանգարաններում, հոգևոր կենտրոններում, տուն-ինտերնատներում, քրեակատարողական հիմնարկներում՝ հավատալով, որ երաժշտության հասանելիությունը ամենուր հնարավոր է՝ անգամ այնպիսի վայրերում, որտեղ դասական երաժշտություն ընդունված չէ լսելը։  2018 թվականից անսամբլն իրականացնում է ներառական, իր տեսակի մեջ միակը ներկայացնող նախագիծ․ բազմաձայն ստեղծագործությունների կատարմանը զուգահեռ՝ թարգմանելով երգը ժեստերի լեզվով։ Ներկայումս ոչ միայն Հայաստանում, այլև ողջ տարածաշրջանում, «Նաիրյան» վոկալ անսամբլը միակն է, որ երգում է ակապելլա, բազմաձայն ստեղծագործություններ՝ միաժամանակ վերծանելով դրանք ժեստերի լեզվով՝ հասանելի դառնալով լսողության խանգարումներ ունեցող անձանց համար։  2019-ին անսամբլն  իրականացրել  է «Ես լսում եմ քեզ» ներառական, մշակութային-երաժշտական ծրագիրը, որի շնորհիվ անսամբլը ժեստերի լեզվով վերծանել է    հայ դասական կոմպոզիտորների 32 ստեղծագործություն, ներկայացել   5 մենահամերգով, որտեղ հնչող բոլոր ստեղծագործությունները վերծանված էին ժեստերով։  2020 թ-ի հունվարի  1-ից   «Մուղդուսյան» արվեստի կենտրոնում մեկնարկել է «Երգը հանուն իրավունքի» ծրագիրը, որի ընթացքում կենտրոնի «Նաիրյան» վոկալ ասնամբլը երաժշտության միջոցով բարձրաձայնում է կանանց իրավունքների հիմնահարցերը։ 

Միաժամանակ, արդեն ժամանակակից երաժշտական լուծումներով անսաբլը  ստեղծել  է «Համարձակ եմ» երգը, որը հենց կնոջ հզորացմանը, կնոջ ազատականացմանն է նվիրված։ «Նաիրյան» վոկալ անսամբլը   մասնակցել  է ներհայստանյան և միջազգային մի  շարք  փառատոնների՝  ԳլոբալՖեստ-Երևան միջազգային մրցույթ-փառատոն՝ գրանպրի մրցանակ,  ԳլոբալՖեստ-Մոսկվա միջազգային մրցույթ-փառատոն՝  առաջին մրցանակ, ԱրտՖեստ միջազգային մրցույթ-փառատոն՝  լավագույն խումբ  մրցանակ, Վերածնունդ միջազգային մրցույթ-փառատոն՝  առաջին մրցանակ, Կոմիտաս համահայկական փառատոն, Վոքս Վիրտուալ  միջազգային փառատոն և այլն։ 

2019-ին անսամբլը համերգային ծրագրով եղել է Եգիպտոսում,  մենահամերգով  ներկայացել Կահիրեի հանդիսատեսին։